聖日耳門出6.1億收購伊巴引發骨牌效應

聖日耳門出6.1億收購 伊巴引發骨牌效應

伊巴謙莫域好大機會以天價5,100萬英鎊加盟巴黎聖日耳門，並將個人累積轉會費推高到1.5億英鎊，若然呢位AC米蘭球星順利空降法甲，世界球壇肯定有骨頭效應，尹佩斯、迪斯高及泰維斯呢啲射手隨時會嚟一次大執位。

法甲富豪球會巴黎聖日耳門自聘任安察洛堤之後，呢位教頭就頻頻向祖家聯賽嘅星級球員打主意，上季已經購入防守中場莫達，今夏又擒擒青以2,400萬英鎊買咗拿玻里嘅阿根廷前鋒拿維斯，雖然佢哋早前撬堤亞高施華臨門撻Q，不過巴黎聖日耳門好快又實行PlanB，就係用5,100萬英鎊收購伊巴謙莫域。另外「綁縛式」要埋堤亞高施華，若然AC米蘭真係唔制，就會行埋PlanC，3,200萬英鎊齋要伊巴謙莫域，務求得到呢位瑞典射手為止。
坦白講，AC米蘭的確係想放走伊巴謙莫域嘅，因為佢除稅後年薪都成700萬英鎊，連腰纏萬貫嘅貝魯斯干尼都話頂唔順，所以今次呢單交易成事機會都好高。最新消息就話，AC米蘭基本上同意報價，依家只係等聖日耳門方面同呢位瑞典球星傾妥個人條件。

累積轉會費全球最高
對伊巴謙莫域嚟講，轉會同食飯、呼吸、瞓覺都一樣咁平常，佢由阿積士轉去祖雲達斯，再踢晒兩間米蘭球會，然後到巴塞隆拿，兜兜轉轉又返AC，大球會幾乎俾佢踢晒，如果今次轉得成去聖日耳門，伊巴謙莫域個人累積轉會費仲會推高到1.5億英鎊，咁計的話就真係全球最貴喇！
有卡塔爾資金做後盾嘅巴黎聖日耳門絕對係大花筒，呢支法甲球會嘅揮霍程度連曼城都追唔上，如果伊巴謙莫域走得成，仲會引發尹佩斯、迪斯高及泰維斯等球星以骨牌效應式轉會，歐洲球壇肯定立立亂。