歐聯外圍賽第2圈次回合今晚惡戰連場，首回合爆冷逼和上季瑞超冠軍希爾星堡嘅威爾斯「一哥」新聖徒，今晚就會作客瑞典，佢哋話就話都信心十足可以再偷雞，不過咪話安高潑佢哋冷水，始終兩班波實力有差距，希爾星堡今晚仲有首席射手艾費特芬保加臣回歸正選，強陣出擊大勝可期，1.47倍「讓球主勝」熱得嚟夠晒穩陣！

威爾斯聯賽只係業餘波，就算係聯賽冠軍新聖徒，都一樣係實力有限之輩，佢哋最有名氣嘅只係曾經入選新西蘭國家隊嘅迪拉柏，土炮史堤夫伊雲斯最巴閉亦都只係入選過吓威爾斯國家隊。首回合佢哋憑地利成功悶和希爾星堡，不過次回合去到人哋地頭，以佢哋仲未開季嘅有限狀態，憑乜再爆冷先？

希爾星堡目前排喺瑞超第3，戰績唔錯，單係7月踢咗5場波，就取得3勝2和。首回合畀新聖徒摸和0:0，無疑幾令人失望，但今仗佢哋會有箭頭艾費特芬保加臣踢番正選，呢位冰島射手今季喺瑞超已經入咗9球，係球隊主要得分點，有佢壓陣兼挾住主場4連勝強勢出擊，要大勝又有幾難？

首回合：希客和0:0

採主客兩回合淘汰制，歐聯為外圍賽第2圈次回合，日聯盃為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。